Golaha Deegaanka Degmada Burco oo kulan la yeeshay Gudoomiyaha Golahaa wakiilada

Hargeysa (Golaa Wakiilada) Isniin 25 March 2019 waxa maanta Gudoomiyaha Golaha Wakiilada JSL Mudane Baashe Maxamed Faarax kulan balaadhan la qaatay Xildhibaanada Golaha Deegaanka Degmada Burco oo uu gudoominayay Gudoomiyaha Golaha Deegaanka Burco ahna Duqa magaalada Burco Mudane Maxamed Yuusuf Cabdiraxmaan (Muraad) iyo 16 xildhibaan oo ka tirsan golahaas.

Shirka waxa Gudoomiyaha Golaha Wakiilada ku wehelinayay Gudoomiyaha Gudi hoosaadka Arimaha Gudaha Cabdilaahi Xuseen Cige (Balaaki) Xoghayaha Guud ee Golaha Mudane Cabdirisaaq Siciid Ayaanle, Gudoomiyaha Gudi Hoosaadka Deegaanka iyo khayraadka Dabiiciga ah Mudane Maxamed X Yuusuf (Waabeeyo) iyo xildhibaan Saleebaan Diiriye Bare oo ka tirsan Gudi hoosaadka Dabagalka Hantida Qaranka.

Golaha Deegaanka ee Degmada Burco ayaa Golaha Wakiilada u soo gudbiyey talo bixin ku saabsan Xeerka Ismaamulka gobolada iyo degmooyinka Xeer Lr. 23/2001 iyo Xeerka midaynta Cashuuraha Xeer Lr.12/2000. Nuxurka qoraalka ay u soo gudbiyeen golaha ayaa wuxuu ahaa in Goluhu hoos u eego Maamul daadejintii dastuurku sameeyey iyo adeegyada bulshada ee golayaaasha Deegaanka dastuurka iyo xeer Lr.23 siiyey inaan Dawlada dhexe shuruuc kale ku sharciyaysanin, sidoo kalena waxay talo bixin ka geysteen Xeerka Midaynta cashuuraha oo ay sheegeen in 10%ka Kastamada iyo 12.5 ka Kabka dawladaha hoose inta la mideeyo in degmooyinka dalka si siman loogu qaybiyo.

Mayorka iyo xildhibaanadii madasha saaka ka hadlay ayaa ka cawday iin Xoolaaha oo Burco khayraad u ah aanay ka helin wixii ay xaqa u lahaayeen oo ay ka qatan yihiin.

Gudoomiyaha Golaaha wakiilada JSL Baashe M Faarax ayaa golaha Deegaanka Burco uga mahadnaqay sida asluubaysan ee sharciga ah ee ay gartooda u akhristeen goluhu isla markaana aanay marnaba ka gole ahaan aqbalaynin in dastuurka sharci ka hor imanayaa uu golohooda dhaafo isla markaana xaqa iyo xuquuqda golayaasha deegaanku leeyihiin ay ka shaqaynayaan sidii ay u heli lahaayeen.

Bahda Warbaahinta Golaha Wakiilada Hargeysa Somaliland