S
Hargeysa ( SL-Parliament) Arbaca 03 April 2019, Gudoomiyaha Golaha wakiilada JSL mudane Baashe Maxamed Faarax, oo ay weheliyaan gudoomiye ku-xigeenka Golaha wakiilada JSL mudane Axmed-Yasiin sh. Cali Ayaanle, Gudoomiyaha gudida arimaha Gudaha Cabdilaahi Xuseen Cige (Balaaki) iyo xoghayaha guud ee Golaha wakiilada Md Cabdirisaaq Siciid Ayaanle ayaa maanta kulan la qaatay weftigii safiiradda Yurub ( EU-da) ka socday ee shalay dalka safarka shaqo ku yimi.
Weftigan oo uu hogaaminayay safiirka EU-da Fulgencio Garrido Ruiz kana koobnaa safiirada dalalka (UK, Denmark, Sweden, Norway, Finland, Swizerland Iyo Madaxa Xafiiska Hargeysa ee UK) ayay labada dhinac ka wada hadleen Mawduucyo dhawra oo ay ka mid tahay qabsoomida doorashada , saami qaybsiga kuraasta gobolada, xeerarka doorashooyinka iyo kootada dumarka.
Gudoomiyaha Golaha wakiilada Mudane Baashe Maxamed Faarax ayaa weftiga u xaqiijiyey ka go’naanshahooda in doorashada golaha wakiiladu ku qabsoonto waqtigii loo mudeeyey diyaaarna ay u yihiin inay kuraasta baneeyaan.
Sidoo kale gudoomiyaha golaha wakiiladu wuxuu weftiga u sheegay inay diyaar u yihiin inay ansixiyaan xeerarka doorashada balse arinta keliya ee ay u cadilan tahay ay tahay Saami qaybsiga kuraasta Gobolada oo aanay suurto gal ahayn in ay xildhibaanadu jaaan gooyaan maadaama xildhibaan waliba deegaan ka soo jeedo oo qadiyadaasi tahay mid u baahan wadatashi qaran.
Kulankan oo ay ka hadleen safiiro dhawr ahi ayay dhamaantood shir gudoonka uga mahadnaqeen sida ay uga go’an tahay qabsoomida doorashadu muhiimad gaaar ahna ay arintaas siinayaan weftigoodu.
Gebagebadii kulanka ayaa ku dhamaaday is-faham buuxa oo labada dhinac ah.
Suleymaan
Cabdisitaar Dubad
Agaasimaha Warbaahinta iyo xidhiidhka Dadweynaha ee Golaha
Wakiilada JSL